mulk ki miTTi kabhi dil se juda hoti nahin
kitna bhi main tang kar luun maan ḳhafa hoti nahin
Diary men jo buzurgon ne likhin thi ibaraten
ab amal ke vaste un par raza hoti nahin
vo mila hai jab se mujh ko maut se lagta hai Dar
us ki shirkat ke bina koi dua hoti nahin
hai gham-e-furqat yahan to kuchh gham-e-hasti bhi hai
dard baḌh jaata hai had se to dava hoti nahin
ḳhuub hai andaz us ke ruThne ka dosto
dil men hai narazi chehre se numa hoti nahin
zindagi to biit jaati hai ye sabit karne men
bas zara sa saath chalna hi vafa hoti nahin
ek arse se mire zindan men ye qaid hai
ruuh mere jism se ‘qasid’ riha hoti nahin
Leave a Reply