gham mujhe hasrat mujhe vahshat mujhe sauda mujhe
ek dil de kar ḳhuda ne de diya kya kya mujhe
hai husul-e-arzu ka raaz tark-e-arzu
main ne duniya chhoḌ di to mil ga.i duniya mujhe
ye namaz-e-ishq hai kaisa adab kis ka adab
apne pa-e-naz par karne bhi de sajda mujhe
kah ke soya huun ye apne iztirab-e-shauq se
jab vo aa.en qabr par fauran jaga dena mujhe
sub.h tak kya kya tiri ummid ne ta.ane diye
aa gaya tha sham-e-gham ik niind ka jhoka mujhe
dekhte hi dekhte duniya se main uTh ja.unga
dekhti ki dekhti rah ja.egi duniya mujhe
jalva-gar hai is men ai ‘simab’ ik duniya-e-husn
jam-e-jam se hai ziyada dil ka a.ina mujhe
Leave a Reply