abdullah-kamal

Sulag Raha Hai Koi Shakhs Kyun Abas Mujh Mein

sulag raha hai koi shakhs kyuun abas mujh men

bujhega kaise abhi shoala-e-nafas mujh men

ajiib dard sa jaaga hai baaen pasli men

ajab sharar-e-talab sa hai pesh-o-pas mujh men

main shakh shakh se liptun shajar shajar chumun

panap rahi hai ajab lazzat-e-havas mujh men

na koi naqsh-e-yaqin hai na koi aks-e-guman

dhuan dhuan hai abhi se naya baras mujh men

na ziist ki koi halchal na maut hi ki fughan

hai kohar kohar sa ik shahr-e-be-haras mujh men

bas ik parinda sa par phadphada ke chikhta hai

bahut udaas hai ab mausam-e-qafas mujh men

kabhi to guzre idhar se bhi tund mauj-e-hava

hain jama kitne hi mausam ke khar-o-khas mujh men

More Poems

Leave a Comment