duniya men kitne rang nazar a.enge na.e
hon diid ke amal men agar zaviye na.e
chehra bhi ansuon se tar-o-taza ho gaya
barish ke ba.ad sabza-o-gul bhi hue na.e
badli hai ye zamin ki miri aankh vo nahin
begana shahr-o-dasht hain aur raste na.e
us ko badal gaya nasha-e-ḳhud-supurdagi
manus ḳhal-o-ḳhad mujhe yaksar lage na.e
sab se juda hain gar mire nau-za.ida ḳhayal
jis ne diye ḳhayal vo alfaz de na.e
Leave a Reply