us ke nibhne ke kuchh nahin asbab
vo taghaful-shiar main be-tab
vajib-ul-qatl hai dil-e-betab
kushta hona hi khuub hai simab
abr ki tirgi men ham ko to
sujhta kuchh nahin sivae sharab
apni kashti ka hai khuda-hafiz
pichhe tufan hai samne girdab
bosa manga to ye javab mila
sikhiye pahle ishq ke adab
us ko phirta hai dhundhta har-su
kyuun kar ankhon se ud na jaae khvab
dard-e-ulfat jo hote hi marte
ye aziyyat na khinchte ahbab
nahin mumkin ki jama hon donon
saqi-e-mehr-vash shab-e-mahtab
samne us ke jo thahar jaaen
nahin be-tabiyon ko itni taab
ahl-e-alam se chahta huun vafa
us ka talib huun jo ki hai nayab
ishq ke saath hi gae dil-o-din
aa gai sail bah gaya asbab
saaf fiqre huun aur hamin par hon
sheva achchha to hai mira adab
hoti gar is jahan men kuchh khubi
kahte kyuun phir sifat men is ki kharab
azmana na dil ko sakhti se
tuut jaae na ye dur-e-nayab
kis tarah bahr-e-ishq se niklun
ye to dariya kahin nahin payab
shoala-e-husn tera kya kahna
phunk de us ke parda-ha-e-hijab
us ki shokhi ka hai taajjub kya
husn ye kuchh aur us pe ain shabab
‘ghalib’ aae hain laao ai ‘majruh’
bada-e-nab men mila ke gulab
Leave a Reply