Jaleel Manikpuri
didar ki havas hai na shauq-e-visal hai
azad har ḳhayal se mast-e-ḳhayal hai
kah do ye kohkan se ki marna nahin kamal
mar mar ke hijr-e-yar men jiina kamal hai
fatva diya hai mufti-e-abr-e-bahar ne
tauba ka ḳhuun bada-kashon ko halal hai
ankhen bata rahi hain ki jaage ho raat ko
in sagharon men bu-e-sharab-e-visal hai
barsao tiir mujh pe magar itna jaan lo
pahlu men dil hai dil men tumhara ḳhayal hai
ankhen laḌa ke un se ham aafat men paḌ ga.e
palkon ki har zaban pe dil ka saval hai
but kah diya jo main ne to ab bolte nahin
itni si baat ka tumhen itna ḳhayal hai
main daman-e-niyaz men ashk-e-chakida huun
koi uTha ke dekh le uThna muhal hai
puchha jo un se jante ho tum ‘jalil’ ko
bole ki haan vo sha.er-e-nazuk-ḳhayal hai
Leave a Reply