Poet
naala jo bulbul-e-tafsida-jigar ka nikla
vo saba zulm-rasida gul-e-tar ka nikla
sub.h dam ghar se jo TukḌa vo qamar ka nikla
kanpta sharq se ḳhurshid-e-sahar ka nikla
bhula kahte nahin us ko ye masal hai mash.hur
shaam ko aa.e agar koi sahar ka nikla
jaan chori ga.i nuqsan hua dil ke sabab
dosh diije kise ye bhedi to ghar ka nikla
ek ko ek na aata tha nazar hosh the gham
bazm men shab ko jo zikr us ki kamar ka nikla
abr-e-tar ho gaya bas sunte hi paani paani
kuchh fasana jo mire dida-e-tar ka nikla
saath aghyaron ko le le ke phire kaun bhala
ye sira pahle kidhar se kaho shar ka nikla
tegh-e-qatil ki zaban chanTe hai saan aaj talak
na maza dil se mire ḳhun-e-jigar ka nikla
phir raha Dar tujhe kis baat ka ai ‘aish’ bata
dil se dhaḌka jo tire naf-o-zarar ka nikla
Leave a Reply