bujhe charagh jalane men der lagti hai
nasib apna banane men der lagti hai
vatan se duur musafir chale to jaate hain
vatan ko lauT ke aane men der lagti hai
ta.alluqat to ik pal men TuuT jaate hain
kisi ko dil se bhulane men der lagti hai
bikhar to jaate hain pal-bhar men dil ke sab TukḌe
magar ye TukḌe uThane men der lagti hai
ye un ki yaad ki ḳhushbu bhi kaisi hai ḳhushbu
chali to aati hai jaane men der lagti hai
vo zid bhi saath men laate hain jaane jaane ki
ye aur baat ki aane men der lagti hai
ye ghonsle hain parindon ke un ko mat toḌo
unhen dobara banane men der lagti hai
vo daur-e-ishq ki rangin hasin yadon ke
nuqush dil se miTane men der lagti hai
ye dagh-e-tark-e-marasim na dijiye ham ko
jigar ke daagh miTane men der lagti hai
ḳhabar bhi hai tujhe dil ko ujaḌne vaale
dilon ki basti basane men der lagti hai
tumhen qasam hai bujhao na pyaar ki sham.en
unhen bujha ke jalane men der lagti hai
bhula.un kaise achanak kisi ka kho jaana
ye hadsat bhulane men der lagti hai
zara si baat pe ham se jo ruuTh jaate hain
unhen to ‘soz’ manane men der lagti hai
Leave a Reply