Bujhe Charagh Jalane Mein Der Lagti Hai

bujhe charāġh jalāne meñ der lagtī hai

nasīb apnā banāne meñ der lagtī hai

vatan se duur musāfir chale to jaate haiñ

vatan ko lauT ke aane meñ der lagtī hai

ta.alluqāt to ik pal meñ TuuT jaate haiñ

kisī ko dil se bhulāne meñ der lagtī hai

bikhar to jaate haiñ pal-bhar meñ dil ke sab TukḌe

magar ye TukḌe uThāne meñ der lagtī hai

ye un kī yaad kī ḳhushbū bhī kaisī hai ḳhushbū

chalī to aatī hai jaane meñ der lagtī hai

vo zid bhī saath meñ laate haiñ jaane jaane kī

ye aur baat ki aane meñ der lagtī hai

ye ghoñsle haiñ parindoñ ke un ko mat toḌo

unheñ dobāra banāne meñ der lagtī hai

vo daur-e-ishq kī rañgīñ hasīn yādoñ ke

nuqūsh dil se miTāne meñ der lagtī hai

ye dāġh-e-tark-e-marāsim na dījiye ham ko

jigar ke daaġh miTāne meñ der lagtī hai

ḳhabar bhī hai tujhe dil ko ujāḌne vaale

diloñ kī bastī basāne meñ der lagtī hai

tumheñ qasam hai bujhāo na pyaar kī sham.eñ

unheñ bujhā ke jalāne meñ der lagtī hai

bhulā.ūñ kaise achānak kisī kā kho jaanā

ye hādsāt bhulāne meñ der lagtī hai

zarā sī baat pe ham se jo ruuTh jaate haiñ

unheñ to ‘soz’ manāne meñ der lagtī hai

Leave a Comment