sar-e-mahshar yahi puchhunga ḳhuda se pahle
tu ne roka bhi tha mujrim ko ḳhata se pahle
ashk ankhon men hain honTon pe buka se pahle
qafla-e-gham ka chala bang-e-dara se pahle
ye to sach hai ki tujhe tark-e-jafa ka haq hai
haan magar punchh to le ahl-e-vafa se pahle
uḌ gaya jaise yakayak mire shanon par se
vo jo ik bojh tha taslim-e-ḳhata se pahle
haan yahi dil jo kisi ka hai ab a.ina-e-husn
ek patthar tha mohabbat ki jila se pahle
aankh jhapka bhi to de dil ko churane vaale
ik tabassum nigah-e-hosh-ruba se pahle
lazzat-e-zist koi us ke muqabil ki nahin
vo jo ik kaif sa taari hai ḳhata se pahle
ibtida hi se na de ziist mujhe dars us ka
aur bhi baab to hain bab-e-raza se pahle
dar-e-mai-ḳhana se aati hai sala-e-taza
aaj sairab kiye ja.enge pyase pahle
raz-e-mai-noshi-e-‘mulla’ hua ifsha varna
kya vo mad-mast na tha laghzish-e-pa se pahle
Leave a Reply