Wo Tirgi-E-Shab Hai Ki Ghar lauT Gae Hain

Saleem Faraz

vo tirgi-e-shab hai ki ghar lauT ga.e hain

us dar se abhi najm-o-qamar lauT ga.e hain

ai mausam-e-gul tu abhi aaya hai yahan par

jab shaḳh-o-shajar dida-e-tar lauT ga.e hain

shab bhar to tiri yaad ka mela sa laga tha

is bhiiḌ men kuchh ḳhvab-e-sahar lauT ga.e hain

ham hain ki tire saath chale jaate hain varna

sab log shuruat-e-safar lauT ga.e hain

jab shaam ke saa.e shajar-o-shaḳh se utre

ham takte hue rah-guzar lauT ga.e hain

aa.e the bahut taish men vo mujh ko Dubone

dekha jo mira azm bhanvar lauT ga.e hain

sannaTe tujhe malne ko aa.e the savere

roka tha bahut ham ne magar lauT ga.e hain

bas ham hain tire shahar men Thahre hue ab tak

sab tajir-e-marjan-o-guhar lauT ga.e hain

ab ke to ye sahra bhi sahara nahin deta

divane sabhi ḳhak-ba-sar lauT ga.e hain

ḳhvabon ko ‘salim’ aankh men rukna hi nahin tha

vo kar ke mujhe zer-o-zabar lauT ga.e hain