kali kali ko diya baghban lahu ham ne
kiya hai tujh ko gulistan men surḳh-ru ham ne
ḳhuda ke vaste us be-vafa ka naam na lo
kiya hai chak-e-gareban abhi rafu ham ne
ḳhizan ke daagh miTe kab gulon ke daman se
tujhe bhi dekh liya mausam-e-numu ham ne
ḳhamosh rah ke tire tund-o-talḳh lahje par
badal diya tira andaz-e-guftugu ham ne
chaman ka rang nikharta hai jis ke partav se
bikher di vo tajalli bhi char-su ham ne
samajh na paa.e vo ab tak qubul-o-rad kaisa
ajiib rang men ki sharh-e-arzu ham ne
‘nasir’ ḳhaam hai ab bhi ḳhayal tauba ka
fuzul toḌ diye saghar-o-subu ham ne
Leave a Reply