le chuko dil jo nigah ko to ye dushvar nahin
lek tum dekhte phirte ho ḳharidar nahin
go ki musharif-ba-halakat huun main is baar pe shoḳh
to ayadat ko gar aave to kuchh azar nahin
tang to ham ko tu ai jaib kare hai lekin
uTh gaya haath gar apna to phir ik taar nahin
go subuk mujh ko zamane ne kiya hai lekin
ye bhi hai shukr kisi dil ka to main baar nahin
majlis-e-mai se mushabah hai ḳharabat-e-jahan
jaan kar yaan jo na ho mast so hoshyar nahin
har bad o nek jahan apni jagah hai matlub
kaun sa uzv badan men hai ki darkar nahin
mai ki tauba ko to muddat hui ‘qa.em’ lekin
be-talab ab bhi jo mil jaa.e to inkar nahin
Leave a Reply