main apne suraj ke saath zinda rahunga to ye ḳhabar milegi
gulab kis shaḳh par khilega charagh ki lau kahan rukegi
main zina-e-ḳhvab se utar kar sahar talak aa to ja.un lekin
ye shaam mujh par ayaan na hogi ye shab mujhe rasta na degi
jo rang mujh men sanvar rahe the vo shaam hote hi kho ga.e hain
jo sham.a mere vajud men jal rahi hai kis sub.h tak jalegi
sahar hui to miri thakan se niDhal ankhon ke thamne ko
ye nuur kis samt men Dhalega ye chhanv kis or se baḌhegi
main ik nizam-e-kohan ke narghe men saans le kar bhi sochta huun
ki sub.h kaise tulua hogi ki shaam kis rang men Dhalegi
main apne ham-rah ek duniya ko le ke jab chal paḌunga ‘sajid’
zamin paani ke narm dhare pe kya yunhi ghumti rahegi
Leave a Reply