Hammad Niyazi
hujra-e-ḳhvab se bahar nikla
kaun ye mere barabar nikla
phaḌ-phaḌaya mire bahar koi
aur parinda mire andar nikla
aankh se ashk nikal aa.e hain
ret se jaise samundar nikla
hijr ko ḳhvab men dekha ik din
aur phir ḳhvab-e-muqaddar nikla
mere pichhe miri vahshat bhagi
main jo divar gira kar nikla
aankh bina.i ganva baiThi to
teri tasvir se manzar nikla
raat siine ki haveli gunji
aur dil shor macha kar nikla
shaam phaili to khula az-sar-e-nau
mera saaya mira paikar nikla
Leave a Reply