miri zindagi kisi moḌ par kabhi ansuon se vafa na de
tiri aankh ki ye ghaTa kahin yuun baras ke mujh ko rula na de
vahi chhanv niim ke peḌ ki vahi shaam de ye faza na de
ga.e mausamon ka asiir huun na.e mausamon ki saza na de
mire naḳhuda tira shukriya koi aur mujh pe karam na kar
tiri maslahat ki hava kahin mira badban uḌa na de
mire ḳhat ko le ke ḳhushi se vo ka.i baar chumegi tu magar
mujhe Dar hai bhiga vo lafz ik mire gham ka qissa suna na de
vahi jis ke pyaar ki aag ne mire ḳhadd-o-ḳhal jhulas diye
mujhe Dar hai ab mujhe dekh ke vo nazar se apni gira na de
tiri shoḳh ankhon men barha ka.i ḳhvab dekhe hain pyaar ke
tira pyaar mera nasib hai kisi aur ko ye vafa na de
Leave a Reply