abrar-ahmad

Mere Pas Kya Kuchh Nahin

mere paas raton ki tariki men

khilne vaale phuul hain

aur be-khvabi

dinon ki murjhai hui raushni hai

aur binai

mere paas laut jaane ko ek maazi hai

aur yaad…

mere paas masrufiyat ki tamam tar ranga-rangi hai

aur be-maanaviyat

aur in sab se pare khulne vaali aankh

main asman ko odh kar chalta

aur zamin ko bichhauna karta huun

jahan main huun

vahan abdiyat apni girhen kholti hai

jangal jhumte hain

badal baraste hain

mor nachte hain

mere siine men ek samundar ne panah le rakkhi hai

main apni aag men jalta

apni barishon men nahata huun

meri avaz men

bahut si avazon ne ghar kar rakkha hai

aur mera libas

bahut si dhajjiyon ko jod kar tayyar kiya gaya hai

meri ankhon men

ek girte hue shahr ka saara malba hai

aur ek mustaqil intizar

aur aansu

aur in ansuon se phuul khilte hain

talab bante hain

jin men parinde nahate hain

hanste aur khvab dekhte hain

mere paas

duniya ko sunane ke liye kuchh giit hain

aur batane ke liye kuchh baten

main rad kiye jaane ki lazzat se ashna huun

aur pazirai ki dil-nashin muskurahat se

bhara rahta huun

mere paas

ek ashiq ki varaftagi

dar-guzar aur be-niyazi hai

tumhari is duniya men

mere paas kya kuchh nahin hai

vaqt aur tum par ikhtiyar ke siva?

More Poems

Leave a Comment