Dikhati Hai Jo Ye Duniya Wo baiTha Dekhta Hun Main

Arshad Jamal Sarim

dikhati hai jo ye duniya vo baiTha dekhta huun main

hai tuf mujh par tamasha-bin ho kar rah gaya huun main

bas itna rabt kaafi hai mujhe ai bhulne vaale

tiri soi hui ankhon men akasr jagta huun main

na kyuun hogi miri bar-avri phir dekhne laa.eq

mohabbat ki mahakti ḳhaak men boya gaya huun main

miri abadiyon men char-su bikhra hai sannaTa

hisar-e-ḳhauf se charon taraf bandha gaya huun main

rulati hain miri yaden hamesha ḳhuun ke aansu

kisi nadar pe guzra hua ik hadsa huun main

musalsal hi baḌha.i hain kisi ki dhaḌkanen main ne

musalsal hi kisi ke zehn se socha gaya huun main

virasat huun main ik Dhalti hui tahzib ki ‘sarim’

kahin khoya gaya huun main kahin paaya gaya huun main