vo to aina-numa tha mujh ko
kis liye us se gila tha mujh ko
de gaya umr ki tanhai mujhe
ek mahfil men mila tha mujh ko
ta mujhe chhod sako patjhad men
is liye phuul kaha tha mujh ko
tum ho markaz meri tahriron ka
tum ne ik khat men likha tha mujh ko
main bhi karti thi baharon ki talash
ek sauda sa hua tha mujh ko
ab pashiman hain duniya vaale
khud hi maslub kiya tha mujh ko
ab dhadakta hai magar surat-e-dil
zakhm ik tum ne diya tha mujh ko
Leave a Reply