mire khuda mujhe vo tab-e-nai-navai de
main chup rahun bhi to naghma mira sunai de
gada-e-ku-e-sukhan aur tujh se kya mange
yahi ki mamlikat-e-sher ki khudai de
nigah-e-dahr men ahl-e-kamal ham bhi hon
jo likh rahe hain vo duniya agar dikhai de
chhalak na ja.un kahin main vajud se apne
hunar diya hai to phir zarf-e-kibriyai de
mujhe kamal-e-sukhan se navazne vaale
samaaton ko bhi ab zauq-e-ashnai de
numu-pazir hai ye shola-e-nava to ise
har aane vaale zamane ki peshvai de
koi kare to kahan tak kare masihai
ki ek zakhm bhare dusra duhai de
main ek se kisi mausam men rah nahin sakta
kabhi visal kabhi hijr se rihai de
jo ek khvab ka nashsha ho kam to ankhon ko
hazar khvab de aur jurat-e-rasai de