qais jangal men akela hai mujhe jaane do
ḳhuub guzregi jo mil baithenge divane do
laal Dore tiri ankhon men jo dekhe to khula
mai-e-gul-rang se labrez hain paimane do
thahro tevri ko chadhae hue jaate ho kidhar
dil ka sadqa to abhi sar se utar jaane do
mana kyuun karte ho ishq-e-but-e-shirin-lab se
kya maze ka hai ye gham dosto gham khane do
ham bhi manzil pe pahunch jaenge marte khapte
qafila yaron ka jaata hai agar jaane do
sham o parvana na mahfil men hon baham zinhar
shama-ru ne mujhe bheje hain ye parvane do
ek aalam nazar aaega giraftar tumhen
apne gesu-e-rasa ta-ba-kamar jaane do
saḳht-jani se main aari huun nihayat ai ‘talḳh’
pad gae hain tiri shamshir men dandane do
hashr men pesh-e-ḳhuda faisla is ka hoga
zindagi men mujhe us gabr ko tarsane do
gar mohabbat hai to vo mujh se phirega na kabhi
gham nahin hai mujhe ghammaz ko bhadkane do
josh-e-barish hai abhi thamte ho kya ai ashko
daman-e-koh-o-bayaban ko to bhar jaane do
vaizon ko na kare mana nasihat se koi
main na samjhunga kisi tarah se samjhane do
ranj deta hai jo vo paas na jaao ‘sayyah’
maano kahne ko mire duur karo jaane do