Jahan Tak Ishq Ki Taufiq Hai Rangin Banate Hain

Dil Shahjahanpuri

jahan tak ishq ki taufiq hai rangin banate hain

vo sunte hain ham un ko sar-guzasht-e-dil sunate hain

udhar haq-ul-yaqin hai ab vo aate ab vo aate hain

udhar anjum miri is zehniyat par muskurate hain

shab-e-gham aur mahjuri ye aalam aur majburi

Tapak paḌte hain aansu jab vo ham ko yaad aate hain

vahin se dars-e-husn-o-ishq ka aghaz hota hai

jahan se vaqi.at-e-zindagi ham bhuul jaate hain

hamen kuchh ishq ke mafhum par hai tabsira karna

ik ah-e-sard ko unvan-e-sharah-e-gham banate hain

baha kar ashk-e-ḳhun khinchi thiin jo a.ina-e-dil men

ham un mauhum tasviron ko ab rangin banate hain

shabab-e-zindagi jalvon ka ik ma.asum nazzara

hamen ai dil vo afsane abhi tak yaad aate hain