parveen-shakir

Gae Janam Ki Sada

vo ek ladki

ki jis se shayad main ek pal bhi nahin mili huun

main us ke chehre ko janti huun

ki us ka chehra

tumhari nazmon tumhari giton ki chilmanon se ubhar raha hai

yaqin jaano

mujhe ye chehra tumhare apne vajud se bhi aziz-tar hai

ki us ki aankhon men

chahaton ke vahi samundar chhupe hain

jo meri apni aankhon men maujzan hain

vo tum ko ik devta bana kar miri tarah pujti rahi hai

us ek ladki ka jism

khud mera hi badan hai

vo ek ladki

jo mere apne gae janam ki madhur sada hai

More Poems

Leave a Comment