chehre pe koi rang shikayat ka nahin tha
lekin vo tabassum hi mohabbat ka nahin tha
chhoḌa bhi mujhe aur bahut ḳhush bhi rahe ho
afsos ke main aap ki aadat ka nahin tha
vaqton ke siyah rang se zarron pe likha hai
duniya men koi daur sharafat ka nahin tha
ab sar ko paTakne se koi faiz nahin hai
marne ka taqaza tha vo hijrat ka nahin tha
darbar bhi tha sahab-e-kirdar bhi lekin
adna sa koi jazb-e-saḳhavat ka nahin tha
Leave a Reply