Ahmad Ali Barqi Azmi
sukun-e-qalb kisi ko nahin mayassar aaj
shikast-e-khvab hai har shakhs ka muqaddar aaj
hai vaz-e-hal miri kyuun ye bad se bad-tar aaj
amir-e-shahr ke badle hue hain tevar aaj
har ek shakhs hai apne hisar men mahsur
hai sab ke darpai azar vo sitamgar aaj
kiya hai gardish-e-dauran ne dar-ba-dar sab ko
jo sar men pahle tha vo paanv men hai chakkar aaj
samajh raha tha jise khair-khvah main apna
vahi hai dushman-e-jan mera sab se badh kar aaj
fasil-e-shahr ke andar the kitne ahl-e-hunar
nahin hai jin se shanasa koi bhi bahar aaj
vo dars lete nahin jang-e-karbala se koi
jo saf-shikan the vo hain dushmanon se shashdar aaj
vo qaum kaise taraqqi karegi duniya men
nahin hai jis ka kahin koi ek rahbar aaj
bikhar ke rah gaya khud jin ka apna shiraza
samajh rahe hain ki hain vaqt ke sikandar aaj
agar muhasba apna karen to paenge
nahin hai ham se jahan men koi bhi bad-tar aaj
jo apne haath se kashti jalate the apni
nahin milenge kahin aise vo qalandar aaj
dikha raha hai mujhe sabz-bagh jo ‘barqi’
vo le ke phirta hai kyuun astin men khanjar aaj
Leave a Reply