jo dasht-e-tamanna men har vaqt bhaTakta hai
insan ka dil aisa ma.asum parinda hai
ik ḳhaak ka tuuda hai par azmat-e-duniya hai
naqqash-e-haqiqat ne kya naqsh tarasha hai
main auron ko kya parkhun a.ina-e-alam men
muhtaj-e-shanasa.i jab apna hi chehra hai
ham apni haqiqat kya pahchan saken yaaro
parda hai nigahon pe zehnon men dhundlaka hai
soz-e-gham-e-hasti se ‘vahid’ tiri nas nas men
ye garm lahu kya hai bahta hua laava hai
Leave a Reply