Poet
vo sanglaḳh zaminon men sher kahta tha
ajiib shaḳhs tha khilta gulab jaisa tha
sulagte jism pe mere gulon ka saaya tha
tire vajud ka vo lams kitna mahka tha
jo ashna the bahut ajnabi se lagte the
vo ajnabi tha magar ashna sa lagta tha
parind shaam Dhale ghonslon ki samt chale
charagh jalte hi us ko bhi lauT aana tha
usi daraḳht ko mausam ne be-libas kiya
main jis ke saa.e men thak kar udaas baiTha tha
hamare gird vahi ahani salaḳhen hain
siyah raat ka kaTna to ek dhoka tha
charagh donon kinaron ke bujh ga.e ‘saghar’
hamari raah men haa.el lahar ka dariya tha
Leave a Reply