Poet
tum ne ab siikh liya mujh ko sata.e rakhna
ek mahshar sa mire dil men uTha.e rakhna
aisa karna ki mire naam ko dil par likh kar
parda-e-zehn ko tauqir dila.e rakhna
main bhi rakkhunga tumhen soch ke shanon pe savar
tum bhi siine se miri aas laga.e rakhna
phir utarna hai mujhe ḳhvab ki gahra.i men
tum nigahon men koi raah bana.e rakhna
muntazir aankh ko mayus na hone dena
ḳhud ko ummid ke raste pe biTha.e rakhna
jaane kab phir se palaT aa.uun tumhari ḳhatir
phuul ehsas ke gulshan men khila.e rakhna
apni ankhon ka diya meri jabin par rakh kar
naam apna miri qismat men jaga.e rakhna
Leave a Reply