vo aa.en uub ga.e hain jo dahr men apne
main ek dasht banata huun shahr men apne
kisi ki yaad bhanvar ban ke is tarah lipTi
ki paanv chhoḌ hi aaya main nahr men apne
sabhi ko baanT ke shaklen ḳhudi rahe be-shakl
hamin akele musavvir the shahar men apne
ginun jo phir se inhen ab to baḌh ga.e honge
gine hain zaḳhm abhi pichhle pahr men apne
ghazal ka za.iqa marte samay bhi taaza rahe
shakar mila.i hai so ham ne zahr men apne
‘charagh’ ham se adibon ne fasla rakkha
tamam sher the halanki bahr men apne
Leave a Reply