Sufi Tabassum
dil ko aa.e ki nigahon ko yaqin aa jaa.e
kisi unvan to koi mere qarin aa jaa.e
bikhre rahne do sar-e-rah nishan-e-kaf-e-pa
jaane kis dam koi avara-jabin aa jaa.e
sunte jaao mira be-rabt fasana shayad
inhi baton men koi baat hasin aa jaa.e
aur phir is ke siva sehr-e-mohabbat kya hai?
yak-ba-yak jaise koi dil ke qarin aa jaa.e
jaam kya chiiz hai mai-ḳhana uḌaao yaro!
jaane kis dam lab-e-saqi pe ”nahin” aa jaa.e
vo tiri yaad ka partav ho ki ho saya-e-zulf
chain aa jaa.e tabi.at ko kahin aa jaa.e
Leave a Reply