Ishq Mein Dil-Lagi Si Rahti Hai

ishq men dil-lagi si rahti hai

gham bhi ho to khushi si rahti hai

dil men kuchh gudgudi si rahti hai

munh par un ke hansi si rahti hai

ye hua hai khuda khuda kar ke

rat-din be-khudi si rahti hai

hashr ke din bhi kuchh gunah kar luun

maasiyat men kami si rahti hai

sadqe main apne ghuncha-dil ke

ye kali kuchh khili si rahti hai

itni pi hai ki baad-e-tauba bhi

be-piye be-khudi si rahti hai

aish bhi ho to lutf-e-aish nahin

har-dam afsurdagi si rahti hai

shab-e-gham ki sahar men nuur kahan

subh bhi shaam hi si rahti hai

ye nahin hai ki parda pad jaae

nashshe men agahi si rahti hai

rahte hain gul lahad ke pazhmurda

shama bhi kuchh bujhi si rahti hai

ho gai kya bala mire ghar ko

rat-din tirgi si rahti hai

ab junun ki evaz hai yad-e-junun

haath men hathkadi si rahti hai

kaf-e-pa se hina nahin chhutti

aag ye kuchh dabi si rahti hai

teri tasvir ho ki tegh tiri

ham se har-dam khinchi si rahti hai

badle botal ke ab haram men ‘riyaz’

haath men zamzami si rahti hai

Leave a Comment