Mela Ram Wafa
zindagi ḳhaak men bhi thi tire divane se
ab na uTThega bagula koi virane se
is qadar ho ga.i kasrat tire divanon ki
qais ghabra ke chala shahr ko virane se
jal-mara aag mohabbat ki ise kahte hain
jalna dekha na gaya sham.a ka parvane se
kis ki begana-vashi se ye tahayyur aaya
ki ab apne bhi nazar aate hain begane se
shaiḳh sahab bhi hue motaqid-e-pir-e-mughan
aaj ye taaza ḳhabar aa.i hai mai-ḳhane se
itni tauhin na kar meri bala-noshi ki
saqiya mujh ko na de maap ke paimane se
ai ‘vafa’ apne bhi jab aankh chura lete hain
be-ruḳhi ka ho gila kya kisi begane se
Leave a Reply