kam se kam duniya se itna mira rishta ho jaa.e
koi mera bhi bura chahne vaala ho jaa.e
isi majburi men ye bhiiḌ ikaTTha hai yahan
jo tire saath nahin aa.e vo tanha ho jaa.e
shukr us ka ada karne ka ḳhayal aa.e kise
abr jab itna ghana ho ki andhera ho jaa.e
haan nahin chahiye us darja mohabbat teri
ki mira sach bhi tire jhuuT ka hissa ho jaa.e
band ankhon ne sarabon se bachaya hai mujhe
aankh vaala ho to is khel men andha ho jaa.e
main bhi qatra huun tiri baat samajh sakta huun
ye ki miT jaane ke Dar se koi dariya ho jaa.e
bas isi baat pe a.inon se bigḌi meri
chahta tha mira apna koi chehra ho jaa.e
bazm-e-yaran men yahi rang to dete hain maza
koi ro.e to hansi se koi dohra ho jaa.e
Leave a Reply