tapish ho soz-e-gham ho ishq men lekin fughan kyon ho
lagi ho aag siine men magar us men dhuan kyon ho
luTa di apne hathon jab mata.a-e-sim-o-zar main ne
to phir ab sang-rezon par gham-e-sud-o-ziyan kyon ho
nigah-e-avvalin to intiha.i kaif-parvar thi
vahi dil men utar kar umr bhar ko nish-e-jan kyon ho
ata-e-gham men bhi tafriq ki talib hai ḳhuddari
jo sab ki dastan-e-gham ho meri dastan kyon ho
na jiite ji shifa baḳhshi na jiine ki dua mangi
koi phir ‘nur’ mayyat par hamari nauha-ḳhvan kyon ho
Leave a Reply