jalva ayaan hai qudrat-e-parvardigar ka
kya dil-kusha ye scene hai fasl-e-bahar ka
nazan hain josh-e-husn pe gul-ha-e-dil-fareb
joban dikha raha hai ye aalam ubhar ka
hain didani banafsha o sumbul ke pech o taab
naqsha khincha hua hai khat-o-zulf-e-yar ka
sabza hai ya ye ab-e-zamurrad ki mauj hai
shabnam hai bahr ya guhar-e-abdar ka
murghan-e-bagh zamzama-sanji men mahv hain
aur naach ho raha hai nasim-e-bahar ka
parvaz men hain titaryan shaad o chust o mast
zeb-e-badan kiye hue khilat bahar ka
mauj-e-hava o zamzama-e-andalib-e-mast
ik saz-e-dil-navaz hai mizrab-o-tar ka
abr-e-tunak ne raunaq-e-mausam badhai hai
ghaza bana hai ru-e-urus-e-bahar ka
afsos is saman men bhi ‘akbar’ udaas hai
suhan-e-ruh hijr hai ik gul-izar ka