azmat-e-shahar-e-ana shan-e-bashar ki surat
mere shanon pe koi hai mire sar ki surat
roz utarta hai samundar men sunahra suraj
roz ban jaati hai ik dida-e-tar ki surat
dil jo sahra ke sarabon se mira uub gaya
yaad aai mujhe bhule hue ghar ki surat
aa ke nazdik mire jalne ka manzar dekho
duur se shoala bhi lagta hai sharar ki surat
ahaten qadmon ki mohlat nahin detin varna
dekhte rahte hain raste bhi safar ki surat
kaun se ahd men kholi hain ye ankhen ham ne
aib lagte hain ‘sukhan’ sab ke hunar ki surat
Leave a Reply