mutale.a ki havas hai kitab de jaao
hamare ahd ko saleh nisab de jaao
shahpar-e-ilm ki jholi kamal se ḳhali
ḳhuda ke vaste koi ḳhitab de jaao
kabhi to hurmat-e-sairabi-e-nazar khul jaa.e
samundaron ko tilism-e-saraab de jaao
haqiqaton ko tamasha nahin bana.unga
munafiqat ki hava hai naqab de jaao
tumhari aḳhiri ummid ban ke lauTunga
vida ki ghaḌiyon ka hisab de jaao
qadim raushniyon se unhen shikayat hai
to shapparon ko naya aftab de jaao
koi to mashghala-e-na-murad jaari ho
zaban ko badriqa-e-inqilab de jaao
isi men ḳhanda-labi shan-e-be-niyazi hai
har ek tiir ka sakit javab de jaao
safar-e-nasib hai ‘rahi’ misal-e-bad-e-ravan
jahat-e-shash ki zamam o rikab de jaao
Leave a Reply