Mumtaz Mirza
be-tarah aap ki yadon ne sataya hai mujhe
chandni raton ne aa aa ke rulaya hai mujhe
aap se koi shikayat na zamane se gila
mere halat ne majbur banaya hai mujhe
aaj phir auj pe hai apna muqaddar shayad
aaj phir aap ne nazron se giraya hai mujhe
apne begane hue aur zamana dushman
be-dimaghi ne miri din ye dikhaya hai mujhe
kaun se dasht men le aaya mujhe mera junun
mud ke dekha hai to kuchh khauf sa aaya hai mujhe
phir hue aaj baham jam-e-gul o naghma-e-shab
phir mire maazi ne ‘mumtaz’ bulaya hai mujhe
Leave a Reply