phuti lab-e-nazuk se vo ik shokh si laali
thodi si shafaq ariz-e-taban ne chura li
phir baam ki janib uthe abru-e-hilali
aur chand ne sharma ke kaha eid-mubarak
chheda vo hasin shab ne tamannaon ka jaadu
lahra gai khalvat-kada-e-naz men khushbu
haule se sanvarne lage ehsas ke gesu
di kis ne dar-e-dil pe sada eid-mubarak
jhalka rukh-e-raushan pe hasin sub.h ka partav
gulnar hatheli pe hina dene lagi lau
zulfon se chali nik.hat-e-varafta ki ik rau
paigham liye aai saba eid-mubarak
sakhiyon ne khayalon ke hasin rang ubhare
jaage kai khvabida se jazbat ke dhare
phute vo nigahon se tabassum ke phuvare
mahaul hua naghma-nava eid-mubarak
sadqe tire ai ruh-e-ada paik-e-latafat
khush aae tire husn ko ye kaif ki saaat
ye tohfa-e-ashar hai nazran-e-ulfat
ai jan-e-haya jan-e-vafa eid-mubarak
Leave a Reply