Niyaz Husain Lakhwera
ek to tujh se miri zaat ko rusva.i mili
aur phir ye bhi sitam hai ki tu harja.i mili
muskurata huun to honTon pe jalan hoti hai
teri chahat men mujhe karb ki yakja.i mili
phir kisi ḳhauf se jazbon ke badan kaanp uThe
jab bhi un shabnami ankhon se pazira.i mili
ek ye log ki sathi bhi badal lete hain
ik mira dil ki jise zaat ki tanha.i mili
jis ne dil valon ki basti men riha.ish rakkhi
us siyah-baḳht ko barson ki shakeba.i mili
zahiran sab hi liye phirte hain raushan ankhen
varna kitne hi jinhen ruuh ki bina.i mili
us ki ankhon men mira naam farozan tha ‘niyaz’
jis ke chehre pe mujhe apni shanasa.i mili
Leave a Reply