Shohrat Bukhari
zindagi tujh pe giran hai tu marega kaise
jis ko rona nahin aata vo hansega kaise
meri ankhon men koi ashk na honTon pe ghazal
dastan-e-gham-e-dil koi sunega kaise
haath shal ho ga.e dil dard se mahrum hua
parda chhoḌa hai jo us ne vo haTega kaise
kaisa nadan hai tu jab mira dil toḌa tha
ye na socha ki tujhe yaad karega kaise
astan chhoḌ ke tera main kahin ka na raha
baiThna aa.e na jis ko vo chalega kaise
ab ke shohrat ko ḳhabar hai tiri bad-ḳhui ki
marsiya dil ka tire aage paḌega kaise
Leave a Reply