kis pe qaabu jo tujhi pe nahin qaabu apna
kis se ummid hamen jab na hua tu apna
jam-e-mai dekh ke jaata raha qaabu apna
ladkhadata huun pakad le koi baazu apna
nikhat-e-gul bahut itrati hui phirti hai
vo kahin khol bhi den turra-e-gesu apna
us ne phir kar bhi na dekha ki ye hai kaun bala
ham ko tha zom ki chal jaega jaadu apna
jis ko samjhe ho vahi chiiz nahin muddat se
ham dikha denge kabhi chiir ke pahlu apna
par-e-parvaz nikalne de qafas men sayyad
kaam dega yahi tuuta hua baazu apna
mil gae khaak men dar par tire itna baithe
is riyazat pe bhi ab tak na hua tu apna
gham nahin jam-e-tilakar utha rakh saaqi
kya gharaz ham ko salamat rahe chullu apna
chaukdi bhuul ke munh takte hain mujh vahshi ke
aake is paanv pe sar rakhte hain aahu apna
kaun ai tul-e-shab-e-gham tira jhagda rakkhe
aaj qissa hi kiye dete hain yaksu apna
nikhat-e-khuld-e-barin phail gai koson tak
vo naha kar jo sukhane lage gesu apna
lillahil-hamd kudurat nahin rahne paati
munh dhula deta hai har subh ko aansu apna
shadi o gham ke rahenge yahi ragde jhagde
qissa jis vaqt talak hoga na yaksu apna
gham men parvana-e-marhum ke thamte nahin ashk
shama ai shama zara dekh to munh tu apna
be-adab mushaf-e-rukhsar pe jhuk padte hain
rakhiye shanon pe zara gher ke gesu apna
sina-e-tang se ghabra ke gaya dil to gaya
munh dikhae na mujhe ab ye siyah-ru apna
phansne vaala tha phansa aa ke tiri zulfon men dil
ba-khuda is men nahin jurm sar-e-mu apna
shaam se jeb men ik talkh dava rakkhi hai
aaj qissa hi kiye dete hain yaksu apna
vahm o idrak o khayalat o dil o khvahish-e-dil
sab to apne hain magar kyuun nahin qaabu apna
‘shad’ samjhate hain kyuun ghair liya kya un ka
chashm-e-tar apni hai jaan apni hai aansu apna