Shah Naseer
sarzamin-e-zulf men kya dil Thikane lag gaya
ik musafir tha sar-e-manzil Thikane lag gaya
gulshan-e-hasti nahin ja-e-shaguftan ai saba
dekh jo ghuncha gaya yaan khil Thikane lag gaya
aabru rakh li ḳhuda ne us ki ham-chashmon men aah
tegh-e-abru ka tiri gha.el Thikane lag gaya
fursat-e-yak-dam pe phula tha hubab-e-ab-ju
tha jo naqsh-e-saf.ha-e-batil Thikane lag gaya
jan-e-shirin di tire ashiq ne bhi juun kohkan
sar se apne maar kar ik sil Thikane lag gaya
rakh qadam hoshyar ho kar ishq ki manzil men aah
jo hua is raah men ghafil Thikane lag gaya
chhanv men naḳhl-e-mizha ki loTta hai tifl-e-ashk
ḳhaak men ya rafta rafta mil Thikane lag gaya
ashna koi na dekha gharq-e-bahr-e-ishq ka
ek dam men jo tah-e-sahil Thikane lag gaya
be-kali kyunkar na hove us ki furqat men ‘nasir’
ishq men us gul-badan ke dil Thikane lag gaya
Leave a Reply