kahan vo dard men mahsus aah karte hain
jo log zaḳhm ke risne pe vaah karte hain
tamam din kisi rahmat ka saaya rahta hai
ham aadhi raat ko aisa gunah karte hain
kisi guzishta zamane ka dukh musallat hai
ki ab hansen bhi to ham log aah karte hain
jinhen talab hai zamane ki un ko hasil ho
tire faqir to bas teri chaah karte hain
main sochti huun ki phir jurm kis ke sar jaa.e
sabhi subut use be-gunah karte hain
nazar na pher ‘muqaddas’ gada samajh ke hamen
hamare naam ke charche to shaah karte hain
Leave a Reply