Arsh Sahbai
masti-e-bada-e-gulfam se vabasta rahi
zindagi raqs-e-mai-o-jam se vabasta rahi
log kahte hain ki kuchh us men mira zikr bhi tha
vo hikayat jo tire naam se vabasta rahi
dil jo ghabraya to mai-ḳhane men ham ja baiThe
har ḳhalish bada-e-gulfam se vabasta rahi
us ki majburi-e-paiham pe zara ghaur karen
jo tamanna dil-e-nakam se vabasta rahi
‘arsh’ muddat hui go tark-e-mai-o-jam kiye
phir bhi tohmat ye mire naam se vabasta rahi
Leave a Reply