Sath Le Kar Apni Barbaadi Ke Afsane Gae

saath le kar apni barbadi ke afsane ga.e

abru-e-anjuman the jo vo divane ga.e

ibtida ye thi ki duniya bhar ki nazren ham pe thiin

intiha ye hai ki ḳhud se bhi na pahchane ga.e

teri fayyazi se kab inkar hai saaqi magar

aise mai-kash bhi hain kuchh jin tak na paimane ga.e

mahfilen mahki hui thiin jin se vo gul kya hue

shayad ab vo gosha-e-turbat ko mahkane ga.e

dusron ke gham men roti thiin jo sham.en bujh ga.iin

aag men ghairon ki jalte the jo parvane ga.e

tishnagi se zarf ko ai saqi-e-mahfil na tol

uTh ga.e to umr-bhar ko phir ye divane ga.e

mashvare to aql bhi deti rahi ‘rahi’ magar

dil ne jo farma.e the vo faisle maane ga.e