bahut hasin thi kabhi ye duniya mire mutabiq
magar raha ab na us ka chehra mire mutabiq
main is liye ik daraḳht se baat kar rahi huun
rahega chup ya javab dega mire mutabiq
tire likhe ko ghalat nahin kah rahi main lekin
saval ye hai ki kyon na likkha mire mutabiq
yahan pe sab mere ḳhanvade se ashna hain
mira ta.aruf na ho sakega mire mutabiq
tire mutabiq main teri rudad sun chuki huun
nahin hai kirdar us men mera mire mutabiq
nikal de tu hi meri ankhon ki suiyan ab
na aa.ega koi shahzada mire mutabiq
main gungunati faqat tira naam us ki lai par
magar ye kam-baḳht dil na dhaḌka mire mutabiq
Leave a Reply