Pher Jo paDna Tha Qismat Mein Wo Hasb-E-Mamul paDa

Arzoo Lakhnavi

pher jo paḌna tha qismat men vo hasb-e-ma.amul paḌa

ḳhanda-e-gul se uḌa vo sharara ḳhirman-e-dil par phuul paḌa

dekh idhar o niind ke maate kis ki achanak yaad aa.i

biich se TuuTi hai angḌa.i haath uThte hi jhuul paḌa

husn-o-ishq ki an-ban kya hai dil ke phansane ka phanda

apne hathon ḳhud aafat men ja ke ye na-maqul paḌa

kaun kahe qismat palTi ya mat palTi sailani ki

rasta kaaT ke jaane vaala aaj idhar bhi bhuul paḌa

haal nahin jiine ke qabil aas nahin marne deti

eḌiyan ragḌe aḳhir kab tak ḳhaak par ik maqtul paḌa

jitne husn-abad men pahunche hosh-o-ḳhirad kho kar pahunche

maal bhi to itne ka nahin ab jitna kuchh mahsul paḌa

rah-e-vafa thi TeḌhi bigḌi thi har gaam uftad na.i

paanv kisi ka TuuT gaya aur haath kisi ka jhuul paḌa

baagh men gulchin hai na hai maali bijli hai na falak pe sahab

ahd-e-ḳhizan men jala hai nasheman aa ke kahan se phuul paḌa

paanv ki taqat taaq hui to band ki aankh aur ja pahunche

‘arzu’ us ko ḳhuub kiya kam raste men jo tuul paḌa