Masoom Ansari
jangal ki tarah phaila hua Dar sameT kar
main jaana chahta huun kahin ghar sameT kar
duniya sameTne ke talabgar hain bahut
rakkha hai main ne ḳhud ko bhi aksar sameT kar
ji chahta hai rakh duun kisi roz aag par
gham-ha-e-rozgar ka daftar sameT kar
kaaTi hai raat ham ne andheron ke darmiyan
ankhon men apni sub.h ka manzar sameT kar
jite-ji koi Daal gaya mere sar pe ḳhaak
apna.iyat ki reshmi chadar sameT kar
‘ma.asum’ asmanon ki rakhte the jo ḳhabar
vo rauzanon men baiTh ga.e par sameT kar
Leave a Reply