Farigh Bukhari
main sho.ala-e-iz.har huun kotah huun qad tak
vus.at miri dekho to hai divar-e-abad tak
mahaul men sab gholte hain apni siyahi
ruḳh ek hi tasvir ke hain nek se bad tak
kuchh fasle aise hain jo tai ho nahin sakte
jo log ki bhaTke hain vo bhaTkenge abad tak
kab tak koi karta phire kirnon ki gada.i
zulmat ki kaḌi dhuup to Dasti hai abad tak
yuun ruThe muqaddar ki koi kaam na ban paa.e
yuun TuuTe sahara koi pahunche na madad tak
ab bhi tire nazdik muvahhid nahin ‘farigh’
iqrar kiya hai tira inkar ki had tak
Leave a Reply