Shahida Majeed
kisi ne phir se laga.i sada udasi ki
palaT ke aane lagi hai faza udasi ki
bahut uḌega yahan par fasurdagi ka ghubar
ki phir se chalne lagi hai hava udasi ki
zamin-e-dil pe mohabbat ki ab-yari ko
bahut hi TuuT ke barsi ghaTa udasi ki
nazar nazar men udasi dikha.i dene lagi
nagar nagar men hai phaili vaba udasi ki
kisi tabib kisi charagar ke paas nahin
koi ilaaj koi bhi dava udasi ki
koi ilaaj nahin hai to phir dua hi karen
ki chhoḌ jaa.e hamen ye bala udasi ki
ai aftab ye aalam tira ghurub ke vaqt
sikha.i kis ne tujhe ye ada udasi ki
zamin-zadon ko virsa mila hai aadam se
hui thi ḳhuld se hi ibtida udasi ki
ye tere dil se tiri ruuh men utar jaa.e
bichhaḌne vaale ne di thi dua udasi ki
ye dil ka kaasa abhi ḳhaam hai ai kuza-gar
tu aur aanch pe us ko tapa udasi ki
Leave a Reply